Երևան, 20.11.2018, 17:09,

Խաբված գործարարը ահազանգում է, եւ անուններ է հնչեցնում.նախկին ոստիկանապետ Ալիկ Սարգսյան, Գրիգոր Գրիգորյան, եւ այլոք.Տեսանյութ

aravot.am-ը գրում է.Վայք քաղաքի բնակիչ, ունեզուրկ գործարար Աշոտ Զաքարյանն այսօր «Նոյյան տապան» լրատվական կենտրոնում լրագրողների հետ հանդիպմանը բարձրաձայնեց մի խնդրի մասին, որում, իր խոսքով, բարձրաստիճան պաշտոնյաներ են ներգրավված: Աշոտ Զաքարյանի խոսքով՝ 2010թ.-ից ինքը նախաձեռնել է Վայոց ձորի մարզի «Արփա» փոքր ՀԷԿ-ի կառուցումը, որի նպատակով վարկեր է վերցրել, անձնական միջոցներ ներդրել, սակայն խաբեության պատճառով զրկվել է սեփականատիրոջ կարգավիճակից, դարձել ունեզուրկ: Նա պատմեց, որ ՀԷԿ-ի կառուցումը գրեթե ավարտված է եղել, սակայն խողովակաշարի պակասող մասը ձեռք բերելու համար դիմել է բարերար, մեծահարուստ Գրիգորյան Պուշկինի Գրիգորյանին, որն էլ, Զաքարյանի պնդմամբ, խաբեությամբ ունեզրկել է իրեն՝ ունենալով նախկին ոստիկանապետ Ալիկ Սարգսյանի, Արցախի նախագահ Բակո Սահակյանի եւ դատական համակարգի ազդեցիկ պաշտոնյաների աջակցությունը:

Աշոտ Զաքարյանի փաստաբան Տիգրան Մուրադյանը տեղեկացրեց՝ Զաքարյանը խողովակաշարի կառուցումն ավարտին հասցնելու համար պարտքով գումար է խնդրել Գրիգորյանից, որը հրաժարվել է՝ փոխարենն առաջարկելով դառնալ ՀԷԿ-ի բաժնետեր. «Նրանց միջեւ կնքվել է համաձայնագիր, ըստ որի՝ բաժնեմասը ձեռք բերելու դիմաց Գրիգոր Գրիգորյանը պետք է ներդրում անի կառուցման ծրագրում՝ հօգուտ Աշոտ Զաքարյանի: Նա, սակայն, ոչինչ չի ստացել, եւ իր բաժնեմասը դարձել է ուրիշի սեփականություն: Սա գնահատվում է որպես Գրիգորյանի կողմից Աշոտ Զաքարյանի բաժնեմասին խաբեությամբ տիրանալու փաստ»: Տիգրան Մուրադյանի խոսքով՝ տարիներ շարունակ դատախազությունը միտումնավոր քրեական գործ չի հարուցել, եւ միայն օրերս է սկսել այդ գործընթացը. «Կարծում ենք՝ ԱԱԾ-ն պետք է զբաղվի դատախազության որոշ պաշտոնյաներով եւ դատական համակարգով»:

Աշոտ Զաքարյանը նաեւ հայտնեց, որ Գրիգոր Գրիգորյանին աջակցում է ԼՂՀ նախագահ Բակո Սահակյանը: Ասաց, որ Արցախում գործում է ոսկու հարստացուցիչ կոմբինատ, որում բաժնեմաս է գրանցված Գրիգոր Գրիգորյանի անվամբ, որը, սակայն, իրականում պատկանում է Բակո Սահակյանին: Աշոտ Զաքարյանը նաեւ նշեց, որ Գրիգոր Գրիգորյանը նախկին ոստիկանապետ Ալիկ Սարգսյանի մտերիմն է. «Գրիգորյանը Երեւանում գործարան ունի, որում բաժնեմաս ունի Ալիկ Սարգսյանի աղջկա կամ փեսայի անունով»:

մանրամասն՝այստեղ: 

Այս թեմայով

Լրահոս
Ամենաընթերցվածները
Մամուլի տեսություն